Arrestohet në Liban 49-vjeçari palestinez që vrau vajzën në Tiranë, pritet ekstradimi në Shqipëri
Është arrestuar në Liban shtetasi palestinez Fadi Alwan, 49 vjeç, i cili akuzohet për vrasjen e vajzës së tij, Rayyan Alwan, ngjarje e ndodhur rreth dy muaj më parë në Tiranë. Krimi i rëndë ndodhi në shkurt 2025, në një apartament në rrugën “Gjon Muzaka”, ku dyshohet se Alwan e goditi vajzën e tij me mjet prerës, duke i shkaktuar vdekjen.
Kapja e tij u bë e mundur falë hetimeve të thelluara të Policisë së Tiranës dhe bashkëpunimit të ngushtë me autoritetet libaneze, nëpërmjet Interpol Tiranës dhe Interpol Beirutit. Ndaj tij, Gjykata e Shkallës së Parë e Juridiksionit të Përgjithshëm Tiranë ka caktuar masën e sigurisë “Arrest në burg” për veprën penale “Vrasja për shkak të marrëdhënieve familjare”.
Aktualisht, vijon procedura për ekstradimin e tij në Shqipëri, ku do të përballet me drejtësinë për krimin e rëndë që ka tronditur opinionin publik.
