Fier: Kandidati i PD-së, Fation Semanjaku, shoqërohet në komisariat pasi vendosi stendë pa leje në sheshin qendror
Kandidati për deputet i Partisë Demokratike për qarkun Fier, Fation Semanjaku, është shoqëruar pasditen e sotme në komisariat nga forcat e rendit, pasi ka vendosur një stendë elektorale pa lejen përkatëse në sheshin qendror të qytetit.
Sipas burimeve, ndërhyrja e policisë erdhi pas konstatimit të vendosjes së stendës në mënyrë të paautorizuar. Semanjaku ka kundërshtuar ndërhyrjen e uniformave blu, çka ka çuar në shoqërimin e tij për në ambientet e komisariatit. Pas disa minutash, ai është lënë i lirë.
Ngjarja ka tërhequr vëmendjen e qytetarëve të pranishëm në shesh dhe është filmuar nga Fieri Web. Pritet që Policia e Fierit të dalë me një komunikatë zyrtare për të sqaruar rrethanat e incidentit.
Ky veprim vjen në kuadër të aktiviteteve të fushatës zgjedhore, ndërsa partitë politike intensifikojnë prezencën e tyre në terren.
