Fier – Ceremoni përkujtimore për Dëshmorin e Policisë Novruz Cenalia
Në Fier është zhvilluar një ceremoni përkujtimore me rastin e 1-vjetorit të rënies në krye të detyrës të Dëshmorit të Policisë, Novruz Cenalia.
Në këtë veprimtari, e mbushur me ndjenjë respekti dhe dhimbjeje, morën pjesë:
- Drejtori i Drejtorisë Vendore të Policisë Fier, Skënder Hita,
- Prefekti i Qarkut Fier, z. Arben Çuko,
- familjarë të Dëshmorit, si dhe
- kolegë dhe punonjës të Policisë së Shtetit.
Në nderim të jetës dhe veprës së tij, pjesëmarrësit vendosën kurora me lule pranë varrit të Dëshmorit Cenalia, duke përkujtuar jo vetëm aktin e tij të lartë të sakrificës, por edhe vlerat njerëzore e profesionale që e karakterizonin.
Drejtori Skënder Hita, në fjalën e tij, theksoi:
“Novruzi, sot nuk është vetëm biri, vëllai, kushëriri, shoku dhe kolegu juaj dhe i yni. Ai sot është gur themeli në shtetndërtim, është pjesë e historisë dhe imazh i misionit të Policisë. Emri i tij është shkruar me germa të arta, për trimërinë tej moshës biologjike dhe për sakrificën tej të vështirës.”
Ai shtoi se rasti i Cenalisë tregon edhe rrezikshmërinë që sjell përballja me krimin dhe domosdoshmërinë për bashkim, profesionalizëm dhe kujdes të vazhdueshëm në radhët e Policisë.
Drejtori Hita garantoi familjarët se Policia e Shtetit do të jetë gjithmonë një derë e hapur mbështetjeje dhe miqësie për ta.
Sakrifica e Dëshmorit Novruz Cenalia do të qëndrojë përherë në piedestalin më të lartë të Policisë së Shtetit.
Lavdi të përjetshme veprës së tij!
