Protestë në burgun e Korfuzit – Të burgosurit shqiptarë denoncojnë kushte çnjerëzore dhe diskriminim
Korfuzi, Greqi – Të burgosurit shqiptarë në burgun e Korfuzit kanë ngritur zërin përmes një proteste ndaj trajtimit që u bëhet brenda ambienteve të burgut, duke denoncuar kushte çnjerëzore dhe diskriminim në krahasim me të burgosurit grekë.
Sipas deklaratave të tyre, të dënuarit shqiptarë jetojnë në kushte skandaloze, ku mungojnë të drejtat themelore të njeriut si ushqimi i mjaftueshëm, uji i pijshëm dhe shërbimi i rregullt mjekësor. Po ashtu, ata pretendojnë se përjashtohen nga mundësitë ligjore për leje të përkohshme dhe lirime me kusht, të cilat, sipas tyre, u ofrohen vetëm të dënuarve grekë.
Në shenjë revolte ndaj kësaj situate, një prej të burgosurve shqiptarë ka djegur qelinë e tij, duke i vënë zjarrin si akt proteste. Pas këtij veprimi, ai është dhunuar rëndë nga gardianët e burgut dhe është kërcënuar me jetë. Pamje të publikuara nga burgu dëshmojnë për kushtet alarmante në të cilat mbahen të burgosurit shqiptarë.
Të dënuarit shqiptarë i bëjnë thirrje Ministrisë së Drejtësisë së Shqipërisë dhe Ambasadës Shqiptare në Greqi që të ndërhyjnë urgjentisht për të garantuar të drejtat e tyre dhe për të hetuar trajtimin e padrejtë që, sipas tyre, u bëhet në mënyrë sistematike.
Ngjarja ka ngritur shqetësime serioze për respektimin e të drejtave të njeriut në burgjet greke dhe ka rikthyer në vëmendje nevojën për mbrojtje konsullore dhe mbikëqyrje ndërkombëtare për të burgosurit shqiptarë jashtë vendit.
