Fier – Nis procedimi penal për katër shtetas, të dyshuar për dhunë dhe shkelje të tjera ligjore
Drejtoria Vendore e Policisë Fier njofton se, si rezultat i punës hetimore të specialistëve të komisariateve në Fier, Lushnjë dhe Mallakastër, janë referuar materialet në Prokurori dhe kanë nisur procedimet penale për katër shtetas, të përfshirë në vepra të ndryshme penale.
🔹 Në Fier, ka nisur procedimi penal për shtetasin H. M., 25 vjeç, banues në fshatin Peshtan, pasi dyshohet se ka ushtruar dhunë psikologjike ndaj ish-të dashurës së tij, një vajzë 17-vjeçare.
🔹 Në Lushnjë, është proceduar penalisht shtetasi A. M., 35 vjeç, banues në fshatin Kashisht, pasi dyshohet se ka ushtruar dhunë ndaj nënës së tij, një akt i rëndë dhe i dënueshëm nga ligji.
🔹 Në Mallakastër, shtetasi A. S., 52 vjeç, banues në fshatin Ninësh, dyshohet se ka goditur me send të fortë një 87-vjeçar, për motive të dobëta. Për këtë veprim ndaj tij ka nisur procedimi penal.
🔹 Gjithashtu, nga Sektori i Qarkullimit Rrugor, ka nisur procedimi penal për shtetasin F. S., 47 vjeç, banues në Lushnjë, pasi u kap duke drejtuar një motomjet pa leje drejtimi.
Materialet procedurale për këto raste i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
Policia e Shtetit vijon të angazhohet me përkushtim në luftën kundër çdo forme të dhunës dhe paligjshmërisë.
