Vr*sje në Lezhë, dyshohet si pjesë e një zinxhiri hakmarrjesh që zgjat prej tri dekadash
Lezhë, 1 qershor 2025 – Një 57-vjeçar është gjetur i vrarë në orët e para të mëngjesit të sotëm në fshatin Tale të Lezhës. Viktima, Pjetër Kaza, është zbuluar pa shenja jete në oborrin e banesës së tij nga bashkëshortja, rreth orës 05:00. Dyshohet se ai është qëlluar me armë zjarri, menjëherë pas kthimit në shtëpi nga puna në minierën e Spaçit, rreth orës 01:00 pas mesnate.
Burime nga policia bëjnë me dije se pista kryesore e hetimeve lidhet me një konflikt të gjatë hakmarrjeje mes dy familjeve, që ka nisur në vitin 1994 me vrasjen e Ndue Kazës, ish-shef i krimeve në qytetin e Rrëshenit. Autorët e dyshuar të asaj ngjarjeje ishin vëllezërit Dod dhe Augustin Gjini, të cilët u arratisën menjëherë pas krimit.
Tre vite më pas, në vitin 1997, Martin Kaza, vëllai i Ndue Kazës, vrau për hakmarrje vëllezërit Gjini në qytetin e Laçit, duke u dënuar më pas me 22 vite burg.
Konflikti u rikthye sërish më 28 prill 2024, kur në një lokal shqiptarësh në Bruksel u ekzekutua Agustin Kaza, vëllai i Pjetrit. Ai u qëllua disa herë me armë zjarri në kokë dhe kraharor nga autorë ende të paidentifikuar.
Me vrasjen e sotme të Pjetër Kazës, numri i viktimave nga familja Kaza në këtë përplasje të gjatë hakmarrjeje shkon në tre.
Policia e Lezhës dhe prokuroria kanë intensifikuar hetimet dhe janë përqendruar në pistën e gjakmarrjes. Aktualisht po punohet për identifikimin e autorëve dhe zbardhjen e plotë të rrethanave të ngjarjes.
Ngjarja ka tronditur komunitetin lokal dhe ka rikthyer në vëmendje problematikën e pazgjidhur të konflikteve të trashëguara në veri të vendit, të cilat vazhdojnë të marrin jetë edhe pas dekadash.
