Fier – Jepen dënimet për vrasjen e 20-vjeçarit Grei Bihuci, një i mitur lirohet, autori Florian Muka, dënohet me 12 vite burg
Fier, 23 qershor 2025 – Ka përfunduar seanca gjyqësore për ngjarjen e rëndë të ndodhur më 11 mars 2024, ku u vra në qendër të Fierit i riu Grei Bihuci, vetëm 20 vjeç. Sot, Gjykata e Shkallës së Parë e Juridiksionit të Përgjithshëm Fier shpalli vendimin për dy të pandehurit.
Seanca u zhvillua nën masa të rrepta sigurie, ku u paraqitën të gjitha palët. Trupi gjykues përbëhej nga kryetari Genci Busho dhe anëtarët Vladimir Cjapi dhe Elira Hroni, ndërsa prokuror i çështjes ishte Petrit Vukaj. Mbrojtja përfaqësohej nga avokati Ervis Goxhaj.
Çfarë kërkoi Prokuroria:
- 25 vite burg për Florian Muka, autor i dyshuar i vrasjes.
- 12 vite burg për të miturin K.M., kushëriri i Florianit.
Qëndrimi i mbrojtjes:
- Florian Muka e pranoi krimin, por deklaroi se kishte vepruar në kushte vetëmbrojtjeje.
- I mituri K.M. (16 vjeç) pranoi se ka qenë prezent gjatë ngjarjes, por nuk ka ndërmarrë asnjë veprim aktiv.
Të dy të akuzuarit kërkuan falje dhe shprehën pendesë për veprimet e tyre.
Vendimi i gjykatës:
- Florian Muka u dënua me 12 vite burg, pasi gjykata pranoi rrëfimin dhe pendesën e tij, duke e kualifikuar veprën penale si vrasje në rrethana të veçanta (neni 76).
- K.M. u dënua vetëm për moskallëzim krimi, me 1 vit burg, të cilin e ka vuajtur gjatë paraburgimit, dhe për këtë arsye u la i lirë.
Ngjarja e marsit 2024 tronditi opinionin publik në Fier, pasi ndodhi në një nga zonat më të frekuentuara të qytetit në mes të ditës.
