FOTOLAJM/ Darka e mikpritjes së liderëve të NATO-s nga familja mbretërore holandeze, Rama dhe Zelensky ‘marrin’ vëmendjen
Publikohet fotoja familjare nga darka në pallatin mbretëror holandez Huis Den Bosch, me çiftin mbretëror si pritës, ku ishin të pranishëm liderët e vendeve anëtare të NATO-s në kuadër të samitit që po mbahet në Hagë. Fotoja është ndarë edhe nga kryeministri Edi Rama në rrjete sociale.
“FOTO FAMILJARE e darkës së mikpritjes së Familjes Mbretërore për liderët e NATO-s”, shkruan Rama.
Presidenti amerikan, Donald Trump shfaqet me një kostum në nuanca blu, krah të cilit ndodhet homologu turk Rexhep Tayip Erdogan. Presidenti ukrainas Volodymyr Zelensky, i cili që kur Rusia nisi luftën është shfaqur me veshje në ngjyrë ushtarake, ka “thyer” rregullin dhe është shfaqur me kostum.
Kreu i qeverisë shqiptare ‘spikat’ me kostumin në bezhë, ndërsa është i pozicionuar në fund të radhës për shkak edhe të gjatësisë së tij. Ai shfaqet krah të homologut të tij hungarez, Victor Orban.
