Tërmet me magnitudë 4.7 godet Janinën, lëkundjet ndihen edhe në Shqipëri
Një tërmet me magnitudë 4.7 të shkallës Rihter është regjistruar mëngjesin e sotëm, më 22 korrik 2025, në orën 08:43, në rajonin e Epirit, Greqi. Sipas të dhënave paraprake, epiqendra ndodhej 10 kilometra në jugperëndim të Pediní, afër qytetit të Janinës, ndërsa thellësia e lëkundjes ishte vetëm 10 kilometra, çka e bëri të ndjehej dukshëm në sipërfaqe.
Lëkundjet janë ndjerë jo vetëm në Greqinë veriperëndimore, por edhe në disa qytete jugore të Shqipërisë, si Gjirokastër, Sarandë, e madje deri në Fier dhe Vlorë. Tërmeti ka shkaktuar dridhje të ndjeshme të objekteve në ambiente të brendshme, por deri tani nuk raportohet për dëme materiale apo të lënduar.
Specialistët e sizmologjisë e cilësojnë këtë një tërmet të rëndësisë mesatare, me mundësi për pasgoditje të lehta në orët në vijim. Autoritetet greke dhe shqiptare vijojnë monitorimin e situatës.
