Berat – Finalizohet operacioni “Kontakti”, 31-vjeçari jep apartament me qira për prostitucion, në pranga dhe dy shtetase vietnameze
Një operacion i koduar “Kontakti”, i zhvilluar nga Sektori për Hetimin e Trafiqeve të Paligjshme në bashkëpunim me Prokurorinë e Beratit, ka çuar në goditjen e një rasti të shfrytëzimit të prostitucionit përmes dhënies me qira të një apartamenti.
Në pranga ka rënë shtetasi Xh. S., 31 vjeç, banues në Berat, i cili ka precedent penal për disa vepra të rënda, përfshirë “Vrasje” e mbetur në tentativë, “Dhuna në familje” dhe “Vjedhje”.
Sipas hetimeve njëjavore, 31-vjeçari iu kishte dhënë me qira apartamentin e tij në lagjen “30 Vjetori” dy shtetaseve nga Vietnami – Th. D., 39 vjeçe dhe Th.(Th.) D., 39 vjeçe – të cilat e përdornin banesën për të ushtruar veprimtari të paligjshme prostitucioni.
Gjatë operacionit janë sekuestruar:
- 2 pasaportat e shtetaseve vietnameze,
- 4 telefona celularë,
- para të përfituara nga veprimtaria kriminale.
Policia njofton se hetimet vijojnë për të identifikuar persona të tjerë të përfshirë në këtë rast.
Materialet i janë referuar Prokurorisë së Beratit për veprime të mëtejshme ligjore.
