Policia e Shtetit përfiton investime dhe pajisje teknologjike nga Britania e Madhe
Policia e Shtetit shqiptare ka marrë sot një donacion të rëndësishëm nga Zyra e Operacioneve Ndërkombëtare e Ministrisë së Brendshme të Britanisë së Madhe, duke përfshirë pajisje të fjalës së fundit të teknologjisë dhe investime për strukturat operative.
Në ceremoninë e dorëzimit morën pjesë Drejtori i Përgjithshëm i Policisë së Shtetit, Drejtues Madhor Ilir Proda, Menaxheri Ndërkombëtar Ndërlidhës nga Zyra e Operacioneve Ndërkombëtare, z. Stephen Law, si dhe drejtues të tjerë të Policisë.
Drejtori Proda falënderoi partnerët britanikë për mbështetjen e vazhdueshme, duke theksuar se donacioni përforcon kapacitetet logjistike të Policisë së Shtetit, sidomos të Njësisë Speciale për Kufirin dhe Migracionin “Delta” në Vlorë dhe strukturave të tjera operative.
Ndërkaq, z. Law u shpreh: “Është kënaqësi të mbështesim Policinë shqiptare. Bashkëpunimi me ju është i një rëndësie të veçantë për ne, dhe ndihem krenar që mundëm të përmirësojmë ambientet dhe teknologjinë e Njësisë Speciale për Kufirin dhe Migracionin, si dhe të pajisim Njësinë e Informacionit për Pasagjerin me ekrane të avancuara.”
Donacioni përfshin:
- Rimobilimin e ambienteve të Njësisë Speciale për Kufirin dhe Migracionin “Delta”, Vlorë, dhe një automjet operativ.
- 4 dylbi termike multispektrale.
- 7 ekrane me parametra të lartë teknologjike, në funksion të Policisë Kufitare dhe Njësisë së Informacionit për Pasagjerin.
Ky kontribut është tregues i bashkëpunimit të ngushtë dhe besimit të partnerëve britanikë në punën dhe profesionalizmin e Policisë shqiptare.
