Mitsotakis hap takimin Transatlantik për Energjinë, Balluku në Athinë për sigurinë dhe diversifikimin energjetik
Kryeministri grek Kyriakos Mitsotakis mbajti fjalën hapëse në takimin “Partneriteti për Bashkëpunim Transatlantik në Energji (P-TEC)”, organizuar nën kujdesin e Departamentit Amerikan të Energjisë, qeverisë greke dhe Qendrës Globale të Energjisë në Këshillin Atlantik.
Në këtë forum morën pjesë Sekretari i Energjisë së SHBA-së, Chris Wright, si dhe ministrat e Energjisë nga vendet e Europës Qendrore dhe Lindore.
E pranishme në punimet e takimit ishte edhe ministrja e Infrastrukturës dhe Energjisë e Shqipërisë, Belinda Balluku, duke theksuar angazhimin e vendit tonë në proceset e bashkëpunimit rajonal për sigurinë dhe diversifikimin e burimeve energjetike.
Në qendër të diskutimeve ishin ulja e varësisë nga gazi rus, zhvillimi i korridoreve të reja të furnizimit, si dhe nxitja e investimeve të përbashkëta në infrastrukturën energjetike.
Shqipëria, siç u theksua në takim, mbetet e përkushtuar të kontribuojë për një të ardhme energjetike më të sigurt dhe të qëndrueshme në rajon.
