Aksident i rëndë në Fier – Makina përplas një mjet bujqësor në Fermë Çlirim, tre të plagosur dërgohen me urgjencë në spital
Një aksident i rëndë rrugor është regjistruar mbrëmjen e sotme në aksin Fier–Seman, në afërsi të fshatit Fermë Çlirim, ku një automjet tip “Ford” ka përplasur nga pas një mjet bujqësor tip freze.
Si pasojë e përplasjes së fortë, tre persona kanë mbetur të plagosur dhe janë transportuar me urgjencë drejt Spitalit Rajonal të Fierit. Sipas të dhënave paraprake, të lënduarit ndodhen jashtë rrezikut për jetën, ndërsa ndihma e parë iu dha menjëherë nga ekipet mjekësore në vendngjarje.
Në vendin e aksidentit mbërritën forcat e policisë rrugore dhe autoambulancat, të cilat bënë të mundur menaxhimin e situatës dhe mbylljen e përkohshme të një segmenti të rrugës për shkak të ndërhyrjes.
Pamjet e siguruara nga Fieri Web tregojnë momentet pas përplasjes, ku duken qartë dëmet e konsiderueshme në të dy mjetet.
Grupi hetimor po punon për të zbardhur shkaqet e aksidentit dhe për të përcaktuar nëse mjeti bujqësor ishte i pajisur me sinjalistikën dhe ndriçimin e nevojshëm për lëvizje në rrugë publike.
