Aksident i rëndë në Sevaster/ Shoferi humb kontrollin e makinës dhe përfundon në humnerë, humb jetën
Një aksident i rëndë me pasojë vdekjen e një personi ka ndodhur në fshatin Mazhar, në njësinë administrative Sevaster, Bashkia Selenicë.
Mësohet se drejtuesi i një automjeti ka humbur kontrollin e mjetit, duke dalë nga rruga dhe përfunduar në një humnerë, nga një lartësi e konsiderueshme.
Përplasja ka rezultuar fatale për drejtuesin e automjetit, banor i zonës, i cili ka humbur jetën në vendngjarje.
Në vendin e aksidentit kanë mbërritur shërbimet e Policisë dhe grupi hetimor, të cilët po punojnë për të përcaktuar rrethanat dhe shkaqet e aksidentit të rëndë.
Vlorë/ Informacion paraprak
Rreth orës 09:40, në fshatin Mazhar, në Sevaster, shtetasi Xh. D., rreth 67 vjeç, banues në fshatin Mazhar, duke drejtuar automjetin tip kamionçinë, dyshohet se ka humbur kontrollin mbi drejtimin e mjetit dhe ka dalë nga rruga.
Si pasojë e aksidentit, drejtuesi i automjetit ka ndërruar jetë në vendngjarje.
Grupi hetimor ndodhet në vendngjarje dhe vijon punën për sqarimin e rrethanave dhe përcaktimin e shkakut të aksidentit.
