Aksident në bypass-in e Fierit, automjeti del nga rruga, plagoset drejtuesi
FIER – Një aksident rrugor është regjistruar pasditen e sotme në bypass-in e Fierit, në segmentin Mbikalimi i Memorialit në drejtim të Levanit.
Sipas informacioneve paraprake, një automjet tip Opel Astra ka dalë nga rruga, duke përfunduar jashtë karrexhatës, në anë të rrugës. Nga pamjet e siguruara në vendngjarje, automjeti ka pësuar dëmtime të konsiderueshme, veçanërisht në pjesën e sipërme dhe anësore të tij.
Pas aksidentit, në vendngjarje kanë mbërritur shërbimet e Policisë dhe ambulanca, të cilat kanë dhënë ndihmën e parë. Drejtuesi i automjetit ka mbetur i dëmtuar dhe është transportuar drejt Spitalit Rajonal të Fierit, ku po merr trajtimin e nevojshëm mjekësor.
Në momentin e ndërhyrjes, një pjesë e rrugës është monitoruar nga shërbimet në terren për garantimin e sigurisë dhe menaxhimin e lëvizjes së automjeteve.
Nuk ka ende të dhëna të plota mbi gjendjen shëndetësore të drejtuesit apo shkaqet që çuan në daljen e automjetit nga rruga.
Grupi hetimor ka nisur veprimet për dokumentimin e ngjarjes dhe përcaktimin e rrethanave të aksidentit. Mbetet për t’u përcaktuar nëse aksidenti ka ardhur si pasojë e humbjes së kontrollit të automjetit apo faktorëve të tjerë.
