Aksident në Fier, një i lënduar pas përplasjes mes një Mercedes-Benz dhe një motorçiklete në Unazën Lindore, drejtuesi i motorit dërgohet me urgjencë në spital
Një aksident rrugor ka ndodhur pak minuta më parë në Unazën Lindore të qytetit, në rrugën “Leonardo Murialdo”, ku një automjet tip Mercedes-Benz është përplasur me një motor, i cili përdorej për shpërndarjen e picave në zonë.
Si pasojë e përplasjes, drejtuesi i motorit ka mbetur i lënduar dhe është transportuar menjëherë me urgjencë në spital për marrjen e ndihmës mjekësore. Burime nga vendngjarja bëjnë me dije se personi i lënduar ka marrë plagë në pjesën e trupit dhe ndodhet nën kujdesin e stafit mjekësor.
Policia e Fierit ndodhet në vendngjarje dhe po kryen të gjitha veprimet për të zbardhur shkaqet e aksidentit. Autoritetet bëjnë apel për kujdes maksimal drejtuesve të mjeteve, veçanërisht në zonat me trafik të dendur dhe rrugë të ngushta si Unaza Lindore.
Ngjarja ka shkaktuar bllokim të përkohshëm të trafikut në zonë, ndërsa qytetarët janë paralajmëruar të shmangin rrugën deri në përfundimin e hetimeve dhe largimin e mjeteve nga vendngjarja.
