Aksident në hyrjen veriore të Lushnjes, makinë përplas të riun me biçikletë
Një tjetër aksident rrugor është regjistruar në qytetin e Lushnjes, këtë herë në hyrjen veriore, pranë rrethrrotullimit të shinave të trenit.
Sipas informacioneve paraprake, një automjet tip Ford ka përplasur një person që lëvizte me biçikletë. Menjëherë pas ngjarjes është njoftuar ambulanca, e cila ka transportuar të riun, rreth 25 vjeç, drejt spitalit të Lushnjes për të marrë ndihmën e nevojshme mjekësore.
Burime nga policia e qarkullimit, e cila ndodhet në vendngjarje, bëjnë me dije se i aksidentuari ndodhet jashtë rrezikut për jetën.
Sipas të dhënave të para, drejtuesi i biçikletës i ka dalë para automjetit në momentin kur mjeti po dilte nga rrethrrotullimi, çka ka sjellë përplasjen. Fatmirësisht, automjeti ka qenë me shpejtësi të ulët dhe i riu ka pësuar dëmtime të lehta, pa pasoja serioze.
Ndërkohë, efektivët e policisë po dokumentojnë ngjarjen dhe po kryejnë procedurat përkatëse.
