Aksident tragjik në Sarandë, me dy viktima – arrestohet 23-vjeçari nga Fieri
Saranda u trondit mbrëmjen e 24 gushtit nga dy ngjarje të rënda.
Specialistët e Seksionit të Trafikut Urban dhe Interurban Sarandë vunë në pranga 23-vjeçarin Kevi Nora, banues në Fier, i cili akuzohet për “Shkeljen e rregullave të qarkullimit rrugor” dhe “Drejtimin e automjeteve në mënyrë të parregullt”.
Sipas Policisë, rreth orës 20:15, në aksin rrugor Delvinë-Sarandë, i riu, në gjendje të dehur (testi i parë i alkoolit rezultoi 1.52 mg/l dhe i dyti 1.42 mg/l), duke drejtuar një automjet tip “Audi”, u përplas me një “Lancia” që drejtohej nga 22-vjeçarja E. Dh. Si pasojë e përplasjes humbën jetën drejtuesja e mjetit, E. Dh., 22 vjeçe, dhe pasagjerja R. Dh., 20 vjeçe, ndërsa një tjetër vajzë, A. Zh., 24 vjeçe, mbeti e plagosur rëndë dhe ndodhet nën kujdesin e mjekëve.
Ndërkohë, në një tjetër ngjarje tragjike, në lagjen nr. 1 të Sarandës, në apartamentin e dajës ku po qëndronte për pushime, është gjetur i vetëvarur një 15-vjeçar nga Tirana.
Policia njofton se materialet për të dyja rastet iu referuan Prokurorisë për veprime të mëtejshme.
Njoftimi i Policisë Sarandë:
•Specialistët e Seksionit të Trafikut Urban dhe Interurban Sarandë arrestuan në flagrancë shtetasin K. N., 23 vjeç, banues në Fier, për veprat penale “Shkelja e rregullave të qarkullimit rrugor” dhe “Drejtimi i automjeteve në mënyrë të parregullt”. Ky shtetas, më datë 24.08.2025, rreth orës 20:15, në aksin rrugor Delvinë-Sarandë, duke drejtuar automjetin tip “Audi”, në gjendje të dehur (nga verifikimet e kryera në vendngjarje ka rezultuar: testi i parë i alkoolit në masën 1.52 mg/l, ndërsa testi i dytë në masën 1.42 mg/l), është përplasur me automjetin tip “Lancia”, me drejtuese shtetasen E. Dh., 22 vjeçe. Si pasojë e aksidentit, humbën jetën shtetaset E. Dh., 22 vjeçe dhe R. Dh., 20 vjeçe, ndërsa shtetasja A. Zh., 24 vjeçe, mbeti e dëmtuar rëndë dhe ndodhet nën kujdesin e mjekëve.- Specialistët për Hetimin e Krimeve në Komisariatin e Policisë Sarandë referuan materiale për vlerësim, pasi më datë 24.08.2025, është gjetur i vetëvarur një i mitur, 15 vjeç, banues në Tiranë, në apartamentin e dajës së tij, në lagjen nr. 1, ku prej disa ditësh qëndronte me pushime.
Materialet iu referuan Prokurorisë, për veprime të mëtejshme.
