Aksident tragjik në Suk-1, Roskovec. Një i vdekur dhe tre të plagosur. Flasin Banorët: nuk kemi rrugë bujqësore per të kaluar bagëtitë
Një aksident i rëndë automobilistik ka ndodhur mbrëmjen e djeshme në fshatin Suk 1, Bashkia Roskovec, ku dy automjete tip Mercedes janë përplasur me njëra-tjetrën. Përplasja ka rezultuar fatale për një bari, ndërsa tre persona të tjerë kanë mbetur të plagosur.
Viktima është identifikuar si Festim Gllava, 49 vjeç, i cili ka ndërruar jetë në vendngjarje. Ndërkohë, një tjetër bari, Kreshnik Azizi, 30 vjeç, është gjetur disa minuta më vonë i plagosur rëndë në një kanal anës rrugës. Ai është transportuar me urgjencë në Spitalin e Traumës në Tiranë, ku ndodhet nën kujdesin e mjekëve.
Të plagosur kanë mbetur edhe dy drejtuesit e mjeteve, të cilët janë dërguar për trajtim në Spitalin Rajonal të Fierit. Policia ka konfirmuar arrestimin e të dy drejtuesve të mjeteve në lidhje me ngjarjen.
Banorët e zonës kanë ngritur shqetësimin se barinjtë detyroheshin të kalonin çdo natë në këtë rrugë për shkak të mungesës së një rruge alternative për lëvizjen e tyre. Ata kërkojnë ndërtimin e një rruge bujqësore për të shmangur tragjedi të ngjashme në të ardhmen.
Ndërkohë, inspektorët e shërbimit veterinar në Bashkinë Roskovec po verifikojnë numrin e bagëtive të ngordhura përmes matrikujve dhe pritet që ato të groposen sipas procedurave përkatëse.
Hetimet për zbardhjen e plotë të aksidentit vijojnë.
