Angli/ Shqiptari tentoi vetëvrasjen në qendrën e dëbimeve Brook House
Një emigrant shqiptar në Angli është duke luftuar me jetën, pas një tentative vetëvrasjeje në qendrën e mbajtjes të azil kërkuesve Brook House pranë aeroportit Gatwick.
Bëhet fjalë për një 38- vjeçar me origjinë nga Librazhdi i cili kishte mbërritur në Angli një vit më parë me gomone.
Të afërmit e tij i thanë Top Channel se ai është duke u mbajtur në jetë në spitalin ICU East Surrey, përmes aparaturave mjekësore.
“Mjekët na kanë dhënë shumë pak shpresë pasi ka dëmtime të forta të tru nga tentativa vetëvrasjes”, tha nipi tij përmes telefonit nga Greqia.
Emigranti shqiptar prej 10 ditësh mbahej në këtë qendër emigrantësh me qëllim dëbimin nga Anglia.
Ai është gjetur në dhomë i varur me çarçafë, veprim të cilin e kishte ndërmarrë 20 minuta përpara se të zbulohej nga shoku i dhomës.
Besohet se një depresion i mundshëm prodhoi tentativën e vetëvrasjes e të riut nga Librazhdi i cili ishte marrë nga oficerët e emigracionit në banesën ku jetonte në Londër.
Ministria e Punëve të Brendshme angleze Home Office kontaktuar nga gazetari i Top Channel Muhamed Veliu, as e mohoi dhe as e kundërshtoi këtë tentativë vetëvrasje të emigrantit shqiptar.
Një zëdhënëse e Home Office tha: Shëndeti dhe mirëqenia e njerëzve nën kujdesin tonë është e një rëndësie të madhe dhe ne jemi të përkushtuar të sigurojmë që ndalimi dhe largimet të kryhen me dinjitet dhe respekt. Janë vendosur një sërë masash mbrojtëse, duke përfshirë një Ekip të Kujdesit Shëndetësor në vend, ku individët mund t’i qasen lehtësisht 24/7.
Një hetim i shtatorit 2023 zbuloi se në qendrën e mbajtjes të emigrantëve Brook House ku tentoi vetëvrasjen shqiptari, në mënyrë të përsëritur kishte dhunë fizike dhe verbale.
Raporti i këtij hetimi nënvizonte se në Brook House kishte një trajtim jo human të emigrantëve në kufijtë e shkeljes së të drejtave të njeriut.
Në Brook House momentalisht është një numër i konsiderueshëm emigrantësh shqiptarë të cilëve i është refuzuar azili e më pas prej andej çdo të mërkurë deportohen drejt Tiranës./ Top Channel
