Antoneta Dhima mirëpret vogëlushin më të ri të vitit 2025 në Maternitetin e Fierit
Në orët e para të vitit të ri, deputetja Antoneta Dhima vizitoi Maternitetin e Fierit për të uruar mirëseardhjen e banorit më të ri të Njësisë Administrative Kuman, një djalë i shëndetshëm me peshë 3650 gram. Vogëlushi, fëmija i dytë i familjes Haska nga fshati Marinëz, u cilësua si një bekim dhe ogur i mbarë për vitin 2025.
“Është emocion i veçantë të përkëdhelësh vogëlushin e parë të vitit të ri, një traditë që e kam ndjekur që nga viti 2014. Ky djalë sjell shpresë dhe lumturi për prindërit e tij dhe për të gjithë ne,” u shpreh znj. Dhima.
Deputetja falënderoi stafin e Maternitetit të Fierit për përkushtimin e tyre të palodhur, duke vlerësuar punën e mjekëve, mamive dhe infermierëve, të cilët ishin në krye të detyrës edhe gjatë natës së ndërrimit të viteve.
Familja Haska, përveç lumturisë për ardhjen në jetë të djalit të tyre, përfiton gjithashtu bonusin prej 80 mijë lekësh, një ndihmë simbolike për familjet e reja.
“Qoftë ky vogëlush i bekuar, me jetë të gjatë dhe i rrethuar nga dashuria e prindërve dhe vëllait të tij. Gëzuar dhe mbarësi për të gjithë në këtë vit të ri!” përfundoi znj. Dhima.
