Atentat i dështuar në Fier/ Qëllohet me armë drejt një motori, plagoset pas rënies nëna e drejtuesit! Në kërkim babë e bir, patën konflikt 6 muaj më parë
FIER-Një atentat i dështuar ka ndodhur sot (9 prill) në Fier. Dy persona, babë e bir kanë qëlluar me armë zjarri drejt një motori që po lëvizte në fshatin Sulaj. Fillimisht u raportua se gruaja që po udhëtonte me djalin e saj ishte plagosur, por burime nga policia informojnë se Suzana Merrnica u lëndua si pasojë e rënies nga motori.
Autorët të identifkuar si Afrim dhe Ali Cimili janë shpallur në kërkim, ndërsa mësohet se kanë lëvizur me makinë. Policia ka ngritur disa pika kontrolli në hyrje/daljet e qytetit të Fierit dhe në akset rrugore “Fier-Vlorë”, “Fier-Lushnjë” për kapjen e tyre. Paraprakisht, burime për Report Tv bëjnë me dije se 2 autorët para një viti kishin pasur një konflikt me të lënduarën.
Ngjarja ndodhi rreth orës 14:00, në segmentin rrugor Fier-Seman, në degën që lidh këtë aks me rrugën drejt fshatrave Sulaj dhe Hamil. Suzana Mërnica ishte në motomjet, të cilin e drejtonte i biri, duke u kthyer në shtëpinë e tyre në fshatin Sulaj. Në dalje të rrugës dytësore, ata janë përballur me të shtëna arme zjarri nga një makinë në ecje. 46-vjeçarja mori plagë pas rënies nga motori, ndërsa autorët u larguan me shpejtësi nga vendngjarja. Gruaja ndodhet në spitalin e Fierit, jashtë rrezikut për jetën.
Gazetarja Marsela Topi informon se sipas Policisë vendore, autorët u identifikuan pas dëshmisë së djalit të Mërnicës, i cili tha se u qëlluan nga Afrim dhe Ali Cimili. Këta të fundit u shpallën në kërkim dhe për kapjen e tyre janë ngritur postblloqe në akset hyrëse dhe dalëse të Fierit.
Dyshohet se mes familjeve Mërnica dhe Cimili ka ndodhur një konflikt 6 muaj më parë, por nuk dhanë sqarime për natyrën e konfliktit. Hetimet vazhdojnë paralelisht, me kërkimet për kapjen e autorëve. Sipas hetimit, ka qenë tentativë e pastër për vrasje, por plumbat nuk goditën objektivin dhe gruaja plagët i ka marrë pas rënies nga motori.
“Rreth orës 14:00, në vendin e quajtur “Mbikalimi i Dërmënasit”, në rrethana ende të paqarta, është plagosur me armë zjarri shtetasja S. M.
Nga hetimet paraprake dyshohet se autorë janë shtetasit A. C., 66 vjeç dhe A. C., 23 vjeç, banues në Dërmënas (babë e bir), të cilët janë shpallur në kërkim. Janë ngritur menjëherë pika kontrolli në hyrje/daljet e qytetit të Fierit dhe në akset “Fier-Vlorë”, “Fier-Lushnjë”.
Gjithashtu, shërbimet e Policisë vijojnë krehjen e zonës, me qëllim lokalizimin dhe kapjen e autorëve. Grupi hetimor ndodhet në vendngjarje dhe në drejtimin e prokurorit, po punon për sqarimin e rrethanave të ngjarjes, si dhe për fiksimin e çdo prove që do t’i shërbejë hetimit, me qëllim kapjen e autorëve”, njoftoi policia.
