Balla: Asnjë tolerancë për ata që shkelin perimetrin e sigurisë në bregdet
Ministri i Brendshëm, Taulant Balla reagoi sot për mjetet ujore që shkelin perimetrin e sigurisë. Balla ndau disa pamje ku tregohet se disa të rinj përdorin mjete ujore brenda perimetrit të sigurisë në bregdet.
“Skena si këto më poshtë do të marrin ndërshkime maksimale dhe nuk duhet mjaftuar me masa administrative apo bllokim mjeti”, theksoi Balla.
“Policia e Shtetit duhet që autorët t’i kallëzojë penalisht për rrezikim të jetës së personave të tjerë. Kush shkel perimetrin e sigurisë në bregdet, duhet ta dijë se nuk mund të ketë asnjë tolerancë”, nënvizoi më tej ministri Balla.
Policia e Shtetit bllokoi dy mjete ujore Jet Ski, pasi kryenin lëvizje të rrezikshme, duke cenuar sigurinë e pushuesve në plazhet e Ksamilit dhe Shëngjinit.
Në Shëngjin dhe në Ksamil u bllokuan 2 prej mjeteve lundruese Jet Ski dhe drejtuesit e tyre u ndëshkuan me masa administrative: 110000 lekë, drejtuesin e një mjeti ujor në Ksamil, për lundrim jashtë zonës së përcaktuar dhe për mungesë të dokumentacionit; 100 000 lekë, drejtuesin e një mjeti ujor në Shëngjin, për lundrim jashtë zonës së përcaktuar.
