Balluku mbledh nesër 12 deputetët socialistë të Fierit në Hekal: Në fokus porositë e Ramës dhe “Pasqyra Unike”
Drejtuesja politike e Partisë Socialiste për qarkun Fier, Belinda Balluku, do të mbledhë nesër 12 deputetët e qarkut në një retreat që do të zhvillohet në Hekal të Mallakastrës.
Takimi vjen pas retreat-it të zhvilluar nga kryeministri Edi Rama në Pogradec, ku janë përcaktuar një sërë udhëzimesh dhe porosish për strukturat e Partisë Socialiste dhe për angazhimin e tyre në territor.
Në Hekal pritet që Balluku t’u përcjellë deputetëve të qarkut Fier këto porosi dhe të përcaktojë mënyrën e zbatimit të tyre në terren, me fokus të veçantë te marrëdhënia me qytetarët dhe ndjekja e problematikave të tyre.
Në qendër të takimit pritet të jenë dokumentet “Besa”dhe “Prania Besnike”, ndërsa një tjetër mekanizëm i rëndësishëm që pritet të diskutohet është “Pasqyra Unike”.
Ky mekanizëm synon që qytetarët të kenë të pasqyruara në mënyrë të unifikuar institucionet dhe shërbimet përkatëse, si dhe rrugën që duhet të ndjekin për trajtimin e kërkesave dhe problematikave të tyre.
Retreat-i i Hekalit pritet të shërbejë si një takim pune për 12 deputetët e qarkut Fier, ku do të përcaktohen detyrat dhe mënyra e organizimit për zbatimin në terren të udhëzimeve të reja politike të mazhorancës.
Takimi zhvillohet në një moment kur Partia Socialiste po kërkon një angazhim më të drejtpërdrejtë të deputetëve dhe strukturave të saj në territor, duke e vendosur komunikimin dhe praninë pranë qytetarëve në fokus të aktivitetit politik.
