Bankers Petroleum Albania emëron Andrija Kojaković si Kryetar të Bordit Mbikëqyrës dhe Bashkëkryetar
Tiranë, 15 Korrik 2025 – Bankers Petroleum Albania ka emëruar z. Andrija Kojaković në rolin e Kryetarit të Bordit Mbikëqyrës dhe Bashkëkryetarit të kompanisë, me synim forcimin e bashkëpunimit me autoritetet shtetërore dhe garantimin e vazhdimësisë së operacioneve.
Z. Kojaković sjell një përvojë të gjerë ndërkombëtare në sektorin e energjisë, diplomaci dhe financa. Ai ka mbajtur pozicione të larta si Drejtor Ekzekutiv i kompanisë INA d.d. në Kroaci, Ambasador i Kroacisë në disa vende kyçe si dhe Anëtar i Bordit të BERZH-it. Në sektorin privat, ai ka themeluar dhe drejtuar Central European Oil Company, me mbështetje nga institucione financiare ndërkombëtare.
Përmes këtij emërimi, kompania përforcon angazhimin ndaj menaxhimit të mirë, transparencës dhe bashkëpunimit institucional. Operacionet e Bankers Petroleum Albania vijojnë normalisht, të udhëhequra nga një ekip inxhinierësh të kualifikuar, ndërsa strukturat drejtuese janë riformuar për të përballuar sfidat aktuale.
“Jemi të përkushtuar ndaj një dialogu konstruktiv me institucionet shqiptare dhe do të vazhdojmë të kontribuojmë në sigurinë energjetike dhe zhvillimin afatgjatë të vendit,” thuhet në deklaratën e kompanisë.
