Bashkia e Fierit ka çelur zyrtarisht sezonin turistik bregdetar 2022.
Këtë vit, festimet dhe aktivitetet e shumta janë përqendruar në plazhin e Semanit, të cilin Bashkia e Fierit e zgjodhi si plazhin e hapjes së këtij sezoni turistik.
Në aktivitetet kanë marrë pjesë kryetare të bashkive të qarkut Fier, deputet të këtij qarku, drejtuesi politik i PS së qarkut Fier, Taulant Balla, vizitorë dhe pushuesit e parë.
Plazhi i Semanit është pjesë e detit Adriatik dhe ka një gjatësi prej rreth 8 km.
Fatmirësisht ai i ka shpëtuar betonizimit, ndarjes dhe uzurpimeve, duke mbetur tërësisht natyror.
Ai karakterizohet nga një rërë e imët dhe mjaftë kurative, nga një brez pyjor i dendur, ujëra të ngrohta dhe të cekëta.
Për këto arsye plazhi i Semanit vazhdon të jetë ndër më të preferuarit për pushuesit fierake, dhe atyre nga rrethinat. Gjatë verës këtu ushtrojnë aktivitetin sezonal rreth 50 stacione plazhi.
