Berat – Arrestohen tre persona për mashtrim me produkte ushqimore, tregtonin mandarina me pesticide të rrezikshme
Berat – Policia e Beratit, në bashkëpunim me Prokurorinë, ka finalizuar operacionin policor të koduar “Injeksioni”, duke goditur një rast të rëndë mashtrimi me produkte ushqimore. Si rezultat, u vunë në pranga tre shtetas të përfshirë në prodhimin, eksportimin dhe shitjen e frutave me përmbajtje të lartë pesticidesh në tregun vendas.
Sipas hetimeve të kryera nga Seksioni për Hetimin e Krimit Ekonomik dhe Financiar, 46-vjeçari Elton Tafa kishte prodhuar dhe magazinuar 10 tonë mandarina në fshatin Goriçan, në pronësi të subjektit të 56-vjeçarit Arben Dyli Kjo sasi ishte eksportuar në Kroaci, ku analizat laboratorike zbuluan nivele të larta të pesticidit Phosmet, duke e bërë të papërshtatshme për konsum. Pasi u kthyen nga Kroacia, frutat u hodhën në tregun shqiptar, duke rrezikuar seriozisht shëndetin e konsumatorëve.
Në pranga përfundoi edhe 30-vjeçari Elson Tahiraj, inspektor i Drejtorisë Rajonale të Veterinarisë dhe Mbrojtjes së Bimëve, i dyshuar për shpërdorim detyre, pasi kishte lëshuar një certifikatë fitosanitare fiktive për subjektin e përfshirë në këtë aktivitet të paligjshëm.
Të tre të arrestuarit do të përballen me akuzat për “Shkelje të rregullave mbi lëndët helmuese”, “Prodhim dhe shitje të ushqimeve të rrezikshme për shëndetin ose jetën e njerëzve”, “Mashtrim me produktet ushqimore” dhe “Shpërdorim detyre”.
Policia dhe institucionet përkatëse theksojnë rëndësinë e kontrolleve të rrepta për të mbrojtur konsumatorët nga produkte të pasigurta dhe vijojnë punën për të identifikuar raste të tjera të ngjashme.
