Biblioteka Publike e Fierit prezanton lexuesit me te mire te vitit
Miq të mirë libra, çaj, verë e ngrohtë, tinguj të bukur dhe surpriza plot dashuri!
Kështu ishte takimi ynë i fundvitit me ata që na motivojnë çdo ditë në punën tonë; lexuesit më të mirë të Bibliotekës!
Në ceremoninë e ndarjes së çmimeve e ftuar speciale ishte aktorja e njohur e artit skenik shqiptar Ema Andrea, e cila dhuroi çaste të paharrueshme për të gjithë, po u shpreh se takimi ishte po aq mbesëlënës dhe për të. Në një duet vargjesh me aktorin Klajdi Marku përcollën më të mirën e leximit; duke qenë protagonistë dhe në ndarjen e çmimeve kryesore.
Në emër të Bibliotekës Ema Andrea ndau dhe çmimet në sektorin e librit shqip për të rritur:
Çmimi I Jorida Mema
Çmimi II Jonida Mehmeti
Çmimi III Eriselda Metushi.
Shkrimtarja e njohur për fëmijë Rudina Çupi, të cilën e kemi tashmë mike të shtrenjtë, e cila ndau çmimet e lexuesve të vegjël.
Në sektorin e librit për fëmijë
Çmimi I Sibora Muçaj
Çmimi II Agnes Canaj
ÇmimiIII Mateo Pone.
“
Ajo fija e hollë që ndan sot faqet e librit, qoftë autostrada juaj në jetë!”, uroi me zemër Rudina gjatë dorëzimit të dhuratave.
Përfaqësuesja e ZVA Fier Zaira Gjika theksoi rëndësinë e Bibliotekës Fier në ndihmesën e nxënësve të shkollave me lexime plotësuese, si dhe rëndësinë e të lexuarit në pasurimin e gjuhës.
Znj.Zaira ndau çmimet për lexuesit më të mirë të sektorit të gjuhëve të huaja:
Çmimi I Klea Çepele
Çmimi II Endri Yzeiraj
Çmimi III Evjona Shpata.
Theksojmë se çmimet bazohen në statistikat e shërbimit të sektorëve dhe sasinë e librave librat të huazuar përgjatë një viti. Në kohët e vështira kur mendohet se libri dhe lexuesit janë duke u pakësuar, lexuesit thonë të kundërtën; Ne e duam librin!
Një surprizë e bukur për fituesit ishte dhe dhurata e platformës online të librit Bukunist që u dhuroi nga një kartë në vlerën 2 000 lekë me të cilën mund të blejnë librat që pëlqejnë.
“Ndihem kaq mirë të vlerësohem për një që e bëj me qejf!” – këto janë fjalët e lexuesit të vogël Mateo që na ngelën në mendje. “Për mua çdo libër që marr në Bibliotekë është një dhuratë!”
