Debat i ashpër në shtëpi, Rogerti përdor fjalë fyese dhe ngacmon Stenaldon: “Ty të ka dënuar Zoti”.
Tensionet në shtëpinë e “Big Brother VIP 5” kanë arritur kulmin gjatë ditës së sotme, pasi debatet mes banorëve u përshkallëzuan dhe u kthyen në përplasje të forta verbale dhe emocionale.
Rogerti, i njohur për deklaratat e tij të drejtpërdrejta dhe provokative, ka qenë në qendër të disa konflikteve me banorët e tjerë, fillimisht me Artanin, më pas me Selin, Krusitën dhe Baby G.
Megjithatë, situata u tensionua ndjeshëm gjatë debatit me Stenaldon, i cili rezultoi më i ashpër se të gjitha përplasjet e mëparshme. Gjatë këtij debati, Rogerti përdori një gjuhë fyese, duke iu drejtuar Stenaldos me fjalë të rënda dhe duke iu referuar verbërisë së tij me shprehjen:
“Ty të ka dënuar Zoti”.
Deklarata shkaktoi reagime të forta brenda shtëpisë dhe u konsiderua tejkalim i kufijve të një debati normal televiziv.
Stenaldo, i cili deri më tani kishte ruajtur qetësinë në përballjet me banorët e tjerë, nuk e përballoi dot këtë situatë. I provokuar nga fjalët ofenduese, ai reagoi papritur duke e shtyrë Rogertin në fytyrë.
Ngjarja tronditi banorët e tjerë dhe ngriti pyetje mbi pasojat që mund të ketë ky incident, si për marrëdhëniet mes konkurrentëve, ashtu edhe për vendimet e mundshme të produksionit. Nuk dihet nëse produksioni do të ndërmarrë masa ndaj veprimeve të kryera gjatë këtij debati.
