Defekti në furnizim lë pa energji disa qytete të Jugut, OSHEE: Ra linja 220 kV
Një defekt në linjën e furnizimit la të dielën pasdite pa energji disa nga qytetet më të mëdha në qendër dhe jug të vendit.
Burimet nga OSHEE tregojnë se linja 220 kilovolt pësoi avari dhe nuk arriti të furnizojë me energji nënstacionin e Spitallës, ndërsa nga Operatori i Sistemit të Transmetimit mësohet se po punohet për riparimin e linjës Kashar–Rrashbull.
Raportohet se rreth orës 17:30 defekti futi në terr Beratin, më pas edhe Durrësin, Vlorën, Fierin, Lushnjën e Sarandën. Përjashtim bëri vetëm Porti i Durrësit, i cili furnizohet me energji elektrike nga gjeneratorët që ka për raste emergjence.
Në Durrës elektriciteti u rikthyer vetëm në disa lagje rreth orës 18:45.
Pa drita mbetën edhe Kavaja, Shkozeti e Rrogozhina. Në Vlorë, energjia elektrike mungoi po ashtu në fshatrat Selenicë, Orikum e deri në Palasë.
