Detaj i ri nga dosja hetimore/ Efektivi Enea Mekolli nuk arriti të qëllonte asnjë plumb gjatë operacionit në Bodesë
Dosja hetimore për vrasjen e efektivit të Policisë së Shtetit, Enea Mekolli, ka zbuluar një detaj të rëndësishëm që mund të ndihmojë në zbardhjen e plotë të ngjarjes së ndodhur më 4 qershor në malin e Bodesë, në Korçë.
Sipas dokumenteve hetimore, arma automatike e efektivit të ndjerë u gjet pranë trupit me 29 fishekë në krëhër dhe një fishek në fole, çka tregon se ai nuk ka arritur të kryejë asnjë qitje gjatë operacionit.
Nga këqyrja e vendit të ngjarjes nuk janë gjetur gëzhoja që t’i përkasin armës së Mekollit. Ndërkohë, në zonë janë sekuestruar dhjetëra gëzhoja të kalibrit 7.62 mm, të cilat dyshohet se janë qitur kryesisht nga arma automatike e autorit të dyshuar, Violand Braçellari.
Sipas hetimeve, policia kishte organizuar një operacion për kapjen e Braçellarit pas një kallëzimi për dhunë dhe kanosje me armë. Në momentin kur efektivët po rrethonin stallat ku ai qëndronte, i dyshuari dyshohet se ka hapur zjarr ndaj forcave të rendit.
Nga sulmi mbeti i vrarë Enea Mekolli, ndërsa u plagos punonjësi i policisë Edison Adri, i cili sipas dosjes hetimore ka përdorur armën e shërbimit dhe ka kryer të paktën gjashtë qitje.
Të dhënat paraprake sugjerojnë se shkëmbimi i zjarrit mes autorit të dyshuar dhe forcave të policisë ka vijuar edhe pasi Enea Mekolli ishte goditur për vdekje. Ekspertizat balistike dhe hetimet në vijim pritet të përcaktojnë me saktësi dinamikën e plotë të ngjarjes.
