Detaje të tjera nga aksidenti ku humbi jetën gazetari Enrik Mehmeti: Motomjeti me katër rrota u përmbys, plagoset edhe një 18-vjeçar
Një ngjarje e rëndë aksidentale është regjistruar mbrëmjen e sotme në zonën e Dajlanit, në Vlorë, ku ka humbur jetën gazetari 40-vjeçar Enrik Mehmeti.
Sipas informacionit paraprak të Policisë, rreth orës 21:40, Mehmeti po lëvizte me një motomjet me katër rrota në një sipërfaqe bregdetare, jashtë zonës rrugore, kur dyshohet se ka humbur kontrollin mbi drejtimin e mjetit. Si pasojë, motomjeti është përmbysur dhe ai ka pësuar dëmtime të rënda trupore.
Menjëherë në vendngjarje kanë mbërritur shërbimet e Policisë dhe autoambulanca. 40-vjeçari u transportua me urgjencë në Spitalin Rajonal të Vlorës, por nuk mundi t’u mbijetojë plagëve të marra.
Në motomjet ndodhej edhe një pasagjer, shtetasi K. S., rreth 18 vjeç, i cili ka pësuar dëmtime të lehta dhe ndodhet jashtë rrezikut për jetën.
Nga verifikimet paraprake rezulton se aksidenti ka ndodhur jashtë zonës rrugore dhe nuk janë përfshirë mjete të tjera apo përdorues të rrugës.
Grupi hetimor, nën drejtimin e Prokurorisë, vijon veprimet për dokumentimin e plotë të rrethanave dhe përcaktimin e shkakut të aksidentit.
