Detaje tronditëse nga plagosja e 17-vjeçarit në Tiranë, i riu u qëllua aksidentalisht gjatë kohës që po konsumonin alkool
Detaje të reja janë zbardhur nga ngjarja e rëndë e regjistruar në Tiranë, ku një 17-vjeçar mbeti i plagosur rëndë me armë zjarri.
Sipas informacioneve paraprake, katër të rinj ndodheshin në banesën private të 19-vjeçarit Rigers Sylaj, ku po konsumonin alkool. Burimet bëjnë me dije se në një moment, 19-vjeçari ka marrë një pistoletë për t’ua treguar shokëve dhe dyshohet se, pa e ditur që arma kishte fishek në fole, ia ka drejtuar në kokë 17-vjeçarit, duke shkaktuar shkrepjen e saj.
Si pasojë, i mituri ka marrë një plagë të rëndë në kokë dhe është transportuar në Spitalin e Traumës, ku ndodhet në gjendje të rëndë shëndetësore.
Mësohet se pas ngjarjes, 19-vjeçari dhe dy shokët e tjerë, të moshave 20 dhe 22 vjeç, të frikësuar e kanë nxjerrë të plagosurin në oborrin e banesës dhe kanë njoftuar ambulancën. Fillimisht, ata kanë deklaruar se kishin dëgjuar një të shtënë arme dhe se 17-vjeçari ishte plagosur në oborr. Megjithatë, gjatë marrjes së mëtejshme në pyetje, kanë pranuar se ngjarja kishte ndodhur brenda banesës gjatë kohës që po konsumonin alkool.
Sipas burimeve, arma e zjarrit dyshohet se i përkiste 19-vjeçarit Rigers Sylaj, i cili raportohet se është djali i një ushtaraku.
Në përfundim të veprimeve hetimore, policia arrestoi 19-vjeçarin për veprat penale “Plagosja e rëndë nga pakujdesia”, “Veprime që pengojnë zbulimin e së vërtetës” dhe “Mbajtja pa leje e armëve dhe municionit luftarak”. Ndërsa dy të rinjtë e tjerë procedohen për veprën penale “Veprime që pengojnë zbulimin e së vërtetës”.
