Dinamika e ngjarjes në Fier – Plagoset një grua, autorët babë e bir në kërkim
Një grua është plagosur me armë zjarri mesditën e sotme në Fier, në një ngjarje që ka tronditur banorët e zonës. Ngjarja ndodhi në segmentin rrugor Fier–Seman, në degëzimin që lidh këtë aks me rrugën drejt fshatrave Sulaj dhe Hamil.
E plagosura është identifikuar si Suzana Mernica, 46 vjeçe, e cila po udhëtonte me një motomjet të drejtuar nga djali i saj, në kthim për në banesën e tyre në fshatin Sulaj. Sipas dëshmisë së djalit, në dalje të rrugës dytësore, ata janë qëlluar me armë zjarri nga një automjet në lëvizje.
Si pasojë e të shtënave, Suzana Mernica mbeti e plagosur dhe u transportua me urgjencë në spitalin rajonal të Fierit, ku ndodhet jashtë rrezikut për jetën.
Policia ka identifikuar autorët e dyshuar të sulmit si Afrim Cimili, 66 vjeç dhe Ali Cimili, 23 vjeç, babë e bir nga fshati Dërmënas, të cilët janë shpallur në kërkim.
Burime nga policia bëjnë me dije se në hyrje dhe dalje të qytetit janë ngritur postblloqe dhe janë intensifikuar kontrollet në akset kryesore për kapjen e tyre. Ndërkohë, grupi hetimor po vijon punën për zbardhjen e plotë të rrethanave të ngjarjes.
Sipas të njëjtave burime, mes familjes Mernica dhe asaj Cimili ka pasur një konflikt disa muaj më parë, por detajet mbi natyrën e këtij konflikti ende nuk janë bërë të ditura.
Hetimet vijojnë.
