“Duhet të jemi gati për ‘play off’-in, e arrijmë objektivin”. Trajneri Tatanjelo: Apolonia me stil të ri, ndryshimi dha 100% efekt
Nga Hilmi Sali
Apolonia e zgjidhi shpejt çështjen e stolit pas largimit të papritur të Sedat Pajazitit. Drejtimi i skuadrës i është besuar një argjentinasi, Matias Tatanjelo, i cili debutoi me fitore. Të dielën Apolonia dominoi ndaj Korabit, ku fituan në shifrat 3-0 dhe objektivi “play off” është më se i arritshëm.
Pas fitores me dibranët, trajneri i Apolonisë, Matias Tatanjelo, për “Panorama Sport” deklaroi: “Jam i kënaqur me paraqitjen kolektive të ekipit. Ishim një ekip që luftoi fort, një ekip që ishte i qetë dhe i fokusuar për të fituar. E merituam plotësisht trepikëshin, sepse ishim ekipi më i mirë në fushë.
Megjithatë, nuk ishte një ndeshje e lehtë, pasi Korabi është një kundërshtar agresiv dhe mbrohet mirë në prapavijë. Hasëm vështirësi në pjesën e parë, por në fraksionin e dytë ishim perfektë në të dyja fazat e lojës. E zgjidhëm shpejt, ndaj e patëm më të lehtë fitoren dhe marrjen e pikëve maksimale. Unë kam ndryshuar komplet idenë e të luajturit, mënyrën e lojës, qasjen që duhet të kemi në fushë.
Jam shumë i kënaqur, sepse për një ditë arritëm ta përgatisnim këtë sfidë dhe ta fitonim. Punuam disa orë në fushë dhe disa orë të tjera ia kushtuam video-analizës. E ritheksoj, kam ndryshuar sistemin e lojës dhe lojtarët e kanë kuptuar 100% idenë time. Jam krenar për lojtarët, i përgëzoj dhe duhet të vazhdojmë kështu.
Jemi drejt fundit, çdo ndeshjeje duhet t’i jepet rëndësia e duhur. Ndeshje të lehta nuk ka, çdo ekip, pavarësisht renditjes, mund të krijojë probleme. Duhet të jemi gati, të rikuperojmë energjitë dhe të arrijmë objektivin, që është zona “play off”, si mundësia e dytë për të tentuar objektivin madhor, Superioren”.
