Dy impiante të reja fotovoltaike miratohen në Fier, kapacitet total 140 MW
Këshilli i Ministrave ka miratuar ndërtimin e dy centraleve të reja fotovoltaike në territorin e Bashkisë Fier, me një kapacitet të kombinuar prej 140 megavatësh. Projektet do të realizohen nga shoqëritë “FOS SOLAR” sh.p.k. dhe “EURON SOLAR-PV” sh.p.k., ndërsa të dy impiantet pritet të vihen në punë brenda 36 muajve.
Impianti i parë, i cili do të ndërtohet në zonën kadastrale 3038 të fshatit Povelçë, Njësia Administrative Dërmenas, do të ketë një kapacitet të instaluar prej 40 MW. Projekti do të zhvillohet nga kompania “FOS SOLAR” sh.p.k. dhe do të operojë për 49 vjet nga hyrja në fuqi e vendimit.
Impianti i dytë, që do të ndërtohet në fshatrat Fushë dhe Povelçë, Bashkia Fier, do të ketë një kapacitet prej 100 MW dhe do të realizohet nga kompania “EURON SOLAR-PV” sh.p.k. Edhe ky projekt parashikohet të vihet në operim brenda 36 muajve dhe do të ketë afat operimi 49-vjeçar.
Sipas vendimeve të qeverisë, të dy projektet nuk janë objekt koncesioni dhe nuk përfitojnë nga masa mbështetëse shtetërore. Gjithashtu, kompanitë kanë detyrimin që t’i japin shtetit falas, në formë royalty, 2% të prodhimit vjetor të energjisë elektrike, ose vlerën monetare ekuivalente që do të derdhet në buxhetin e shtetit.
Ministria e Infrastrukturës dhe Energjisë, së bashku me Agjencinë Kombëtare të Burimeve Natyrore, do të monitorojnë ecurinë e projekteve çdo tre muaj, duke verifikuar realizimin e punimeve dhe respektimin e kushteve teknike e mjedisore.
Me këto dy investime të reja, zona e Povelçës dhe Dërmenasit pritet të forcojë më tej rolin e saj si një nga qendrat kryesore të prodhimit të energjisë diellore në Shqipëri.
