“Festa e Luleve” çel festimet e Ditës së Verës në Fier
Bashkia Fier ka nisur sot festimet me rastin e Ditës së Verës, duke hapur kalendarin festiv me “Festën e Luleve” në sheshin qendror të qytetit. Në këtë aktivitet morën pjesë 350 fëmijë nga kopshtet publike, të cilët sollën atmosferë pranverore përmes performancave dhe dekorimeve shumëngjyrëshe.
Sheshi qendror i Fierit u shndërrua në një hapësirë festive, ku muzika dhe gjallëria e fëmijëve dhanë mesazhin e parë të pranverës.
Ndërkohë, festimet do të vijojnë nesër në mbrëmje me një koncert të madh festiv, ku pritet të performojnë mbi 30 artistë të njohur shqiptarë dhe fierakë.
Ky kalendar festiv, i organizuar për herë të parë nga Bashkia e Fierit, synon të diversifikojë aktivitetet artistike në qytet, duke e shndërruar atë në një destinacion të vizitueshëm dhe festiv gjatë gjithë vitit.
