Fier – Dërgohen në gjyq dy të rinj që tentuan të vrasin një shtetas pas një konflikti banal në lagjen Sheq i Madh.
Prokuroria pranë Gjykatës së Shkallës së Parë të Juridiksionit të Përgjithshëm Fier ka përfunduar hetimet dhe ka dërguar për gjykim shtetasit Enea Nebiu dhe Klenis Kazazaj, të akuzuar për tre vepra penale pas plagosjes së rëndë me armë zjarri të shtetasit O.B.
Ngjarja ndodhi më 30 korrik 2023, në kompleksin “Albes”, në lagjen Sheq i Madh, Fier. Fillimisht, viktima O.B. u konfliktua verbalisht me të pandehurit, të cilët më pas u larguan me automjetin e tyre Audi A8. Rreth orës 05:30, ata u rikthyen në lokal, ku debati u përshkallëzua dhe shtetasi E.N., nga brenda automjetit, qëlloi me armë zjarri në drejtim të O.B., duke e lënë të plagosur rëndë. Në automjet ndodhej edhe K.K., i cili akuzohet për moskallëzim krimi.
Prokuroria i ngarkon të pandehurve akuzat për:
- “Vrasje me dashje” mbetur në tentativë (nenet 76-22 të Kodit Penal),
- “Mbajtja pa leje e armëve dhe municionit” (neni 278/1),
- dhe “Moskallëzim krimi” (neni 300).
Institucioni i akuzës shprehet se do të vijojë angazhimin për hetimin dhe vënien para drejtësisë të çdo personi që kryen vepra penale kundër jetës dhe shëndetit.
