Fier/ Finalizohet operacioni antidrogë “Casus”, në pranga 31-vjeçari nga Roskoveci
Policia e Fierit ka finalizuar me sukses operacionin policor antidrogë të koduar “Casus”, duke goditur një rast të shpërndarjes së lëndëve narkotike në doza të vogla.
Në kuadër të këtij operacioni, u arrestua në flagrancë shtetasi Jashar Çepele, 31 vjeç, banues në Roskovec, i dyshuar për sigurimin dhe shitjen e lëndës narkotike Cannabis Sativa.
Gjatë kontrollit fizik dhe në banesën e tij, shërbimet e Policisë sekuestruan:
- 3.6 kg lëndë narkotike Cannabis Sativa (një pjesë e ndarë në doza gati për shitje);
- 1 peshore elektronike, që shërbente për ndarjen e lëndës;
- një shumë parash, e dyshuar e përfituar nga aktiviteti kriminal;
- 2 celularë.
Operacioni u zhvillua nga specialistët e Seksionit për Hetimin e Narkotikëve në bashkëpunim me Forcën Operacionale, pas menaxhimit të shpejtë të informacionit policor mbi veprimtarinë e të dyshuarit.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier për veprime të mëtejshme.
