Fier/ Finalizohet operacioni antidrogë “Price”, arrestohen dy persona, procedohen katër të tjerë
Policia e Fierit ka finalizuar operacionin policor antidrogë të koduar “Price”, duke goditur një rrjet shpërndarjeje të lëndëve narkotike në doza.
Si rezultat i këtij operacioni, u arrestuan në flagrancë shtetasit Emrah Morina, 28 vjeç, dhe R. N., 30 vjeç, ndërsa u proceduan në gjendje të lirë katër shtetas të tjerë, mes tyre edhe dy minorenë.
Gjatë kontrollit në banesën e 28-vjeçarit, e cila shërbente si pikë shitjeje, policia sekuestroi 508 gramë kokainë dhe qindra doza kanabisi, me vlerë tregu rreth 90,000 euro. Gjithashtu, u gjetën pajisje për ndarjen e lëndëve narkotike, tetë celularë dhe dy automjete.
Operacioni u zhvillua nga Seksioni për Hetimin e Narkotikëve, në bashkëpunim me Seksionin Operacional dhe Prokurorinë e Fierit, pas një hetimi proaktiv dhe bazuar në të dhëna të inteligjencës policore.
Materialet procedurale i kaluan Prokurorisë pranë Gjykatës së Shkallës së Parë Fier, për veprime të mëtejshme ligjore.
Njoftim i Policisë Fier:
Finalizohet pas ndjekjes me metoda proaktive, operacioni policor antidrogë i koduar “Price”.
Shiste Kokainë dhe Cannabis në doza, nga banesa e tij, në lagjen “Afrim i Ri”, arrestohet 28-vjeçari, me precedent në këtë fushë.
Në pranga edhe një 30-vjeçar, si dhe në hetim 4 shtetas, blerës të dozave të lëndëve narkotike.
Sekuestrohen 508 gramë Kokainë dhe qindra doza Cannabisi, me vlerë në treg rreth 90 000 euro. Gjithashtu, sekuestrohen pajisje për ndarjen e lëndëve narkotike në doza, 8 celularë dhe 2 automjete.
Si rezultat i një hetimi me metoda proaktive dhe në bazë të informacioneve të siguruara nga inteligjenca policore, mbi implikimin e një shtetasi në veprimtarinë kriminale të shitjes së lëndëve narkotike, në doza, specialistët e Seksionit për Hetimin e Narkotikëve, në bashkëpunim me specialistët e Seksionit Operacional dhe me Prokurorinë e Fierit, finalizuan operacionin policor të koduar “Price”.
Gjatë operacionit u arrestuan në flagrancë shtetasit E. M., 28 vjeç, dhe R. N., 30 vjeç. Gjithashtu, nisi procedimi në gjendje të lirë për shtetasit K. T., 30 vjeç dhe V. K., 19 vjeç, si dhe për 2 shtetas të moshave 16 dhe 17 vjeç.
28-vjeçari u kap në flagrancë duke i shitur në banesën e tij, doza Kokaine dhe Cannabisi, shtetasit R. N. dhe 4 shtetasve të proceduar, të cilët shoqëronin 30-vjeçarin.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
