Fier – Finalizohet operacioni “Led”, zbulohet një ambient i përshtatur për kultivim të kanabisit në një banesë në Vadhizë; arrestohen 2 person
Policia e Fierit ka finalizuar me sukses një tjetër operacion antikanabis, të koduar “Led”, duke zbuluar dhe goditur një rast të kultivimit të bimëve narkotike në ambiente të mbyllura.
Operacioni u zhvillua nga Seksioni për Hetimin e Narkotikëve në bashkëpunim me shërbimet e Komisariatit të Policisë Fier, mbi bazën e informacioneve të marra në rrugë operative dhe veprimeve të shpejta hetimore.
Gjatë operacionit u identifikua një banesë në fshatin Vadhizë, e cila ishte përshtatur si ambient për kultivimin e bimëve narkotike me anë të llambave, aspiratorëve, filtrave të ajrit dhe pajisjeve të tjera elektrike. Banesa rezultonte me lidhje të paligjshme të energjisë elektrike, duke e përdorur për të ushqyer sistemin e kultivimit.
Në përfundim të operacionit u arrestua shtetasi Isa Gashi, 63 vjeç, banues në Vadhizë, si autor i dyshuar i kultivimit të bimëve narkotike. Po ashtu, në vijim të veprimeve hetimore, u vu në pranga punonjësi i OSHEE-së, shtetasi Ramis Malaj, 61 vjeç, banues në Patos, i dyshuar për shpërdorim detyre, pasi dyshohet se ka favorizuar këtë aktivitet kriminal duke mos evidentuar lidhjen e paligjshme të energjisë elektrike.
Gjatë kontrollit në banesë, policia sekuestroi në cilësinë e provës materiale:
- 41 bimë narkotike Cannabis Sativa
- 57 fidanë kanabisi
- Një sasi lënde narkotike të përpunuar
- 784 fara kanabisi
- 5 panele elektrike, 8 llamba, 3 ventilatorë, 2 aspiratorë, 2 filtra ajrimi dhe 18 pajisje të tjera elektrike të përdorura për kultivim.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier për veprime të mëtejshme ligjore.
🔹 Policia e Shtetit fton qytetarët të denoncojnë çdo rast të paligjshmërisë në numrin 112 ose përmes aplikacionit “Komisariati Dixhital”.
#AngazhimPërkushtimSakrificë
#TëVendosurKundërKrimit
#NëÇdoSkajTëVendit
#NëShërbimTëQytetarëve
#Denonco112
