Fier – Kapet në tentativë për t’u larguar në Greqi autori i dytë i plagosjes në Shtyllas
Pas disa orësh kërkimesh intensive, shërbimet e Komisariatit të Policisë Fier dhe ato të Drejtorisë Vendore të Policisë Fier kanë bërë të mundur lokalizimin dhe ndalimin e autorit të dytë të ngjarjes së ndodhur pak ditë më parë në fshatin Shtyllas, ku një baba dhe i biri tentuan të vrisnin shtetasin Llesh Marku
Në bazë të informacioneve të siguruara në rrugë operative, policia është vënë në ndjekje të shtetasit Ndue Paluca, 40 vjeç, i cili po tentonte të largohej drejt Sarandës me qëllim kapërcimin e kufirit në drejtim të Greqisë.
Në bashkëpunim me Komisariatin e Policisë Sarandë, forcat operacionale të Komisariatit Fier bënë të mundur kapjen e tij në momentin që po hipte në autobusin e linjës për Konispol.
Pas ndalimit, ndaj shtetasit Ndue Paluca u mor masa e arrestit për veprën penale “Vrasja me paramendim”, e kryer në bashkëpunim, e mbetur në tentativë.
Materialet procedurale i kaluan për ndjekje të mëtejshme Prokurorisë pranë Gjykatës së Shkallës së Parë të Juridiksionit të Përgjithshëm Fier.
