Fier – Ndezja e Pemës së Krishtlindjeve sjell atmosferë magjike në sheshin qendror
Atmosfera festive ka pushtuar sheshin qendror të Fierit mbrëmjen e sotme, ku u ndezën dritat e Pemës së Krishtlindjeve në një ceremoni të mbushur me emocion, gëzim dhe pjesëmarrje të madhe qytetare.
Në qendër të festës ishin fëmijët e shkollave të qytetit, të cilët me veshjet e tyre festive dhe entuziazmin e pafund i dhanë ngjyrë dhe gjallëri këtij momenti të veçantë. Të pranishmit u mrekulluan nga këngët, vallëzimet dhe energjia e vogëlushëve, duke e shndërruar sheshin në një skenë të vërtetë festimesh.
Kryetari i Bashkisë Fier, Armando Subashi, mbajti fjalën hapëse, ku theksoi rëndësinë e bashkimit të komunitetit dhe shpërndarjes së gëzimit gjatë ditëve të festave të fundvitit.
Një moment i veçantë i mbrëmjes ishte edhe bashkimi me festën i vogëlushes fierake, Nikita, e cila solli edhe më shumë emocion në shesh, duke marrë duartrokitjet e të gjithë të pranishmëve.
Nën numërimin e përbashkët, dritat shumëngjyrëshe të pemës u ndezën, duke shënuar fillimin zyrtar të sezonit festiv në Fier. Ky akt simbolik shërbeu si një çast reflektimi dhe falënderimi, por edhe si një premtim për një vit të ri më të mirë e të begatë.
Me këtë aktivitet, Fieri i ka dhënë startin një serie eventesh kulturore dhe sociale që do të pasurojnë qytetin gjatë gjithë muajit, duke treguar se festat janë një mundësi për të forcuar lidhjet midis qytetarëve dhe për të ndarë gëzimin e përbashkët.
