Fier – Nis aksioni i pastrimit të zonave bregdetare pas vërshimeve të Vjosës dhe Semanit
Pas vërshimeve të javës së kaluar të lumenjve Seman dhe Vjosë, tonelata me mbetje urbane dhe inerte kanë mbuluar zonat bregdetare të Fierit. Autoritetet vendore kanë nisur sot një aksion të gjerë për pastrimin dhe grumbullimin e tyre.
Punonjës të Ndërmarrjes së Pastrimit, të pajisur me mjete dhe makineri të rënda, po largojnë tonelata mbetjesh plastike, drusore dhe inerte që lumenjtë kanë transportuar drejt detit Adriatik, duke përfshirë zonat e Darëzezës dhe Semanit.
Kryebashkiaku Armando Subashi tha se aksioni do të vijojë për shkak të hapësirës së madhe që mbulojnë mbetjet dhe pritet të zgjasë rreth dy javë. Përveç punonjësve, në aksion po përdoren skrep dhe eskavatorë për pastrimin e zonave bregdetare.
Qëllimi i aksionit është rikthimi i pastërtisë dhe sigurimit të zonave bregdetare të Fierit për qytetarët dhe vizitorët.
