Fier – Parkimi i gabuar bllokon rrugën, procedohet penalisht 39-vjeçari
Ok Një rast tjetër i parkimeve të parregullta që pengojnë qarkullimin ka rënë në sy në lagjen “29 Nëntori” në Fier. Automjeti i shtetasit J. H., 39 vjeç, banues në Fier, ishte parkuar në mënyrë të tillë që pengonte lëvizjen e mjeteve të tjera, duke krijuar shqetësim për banorët dhe përdoruesit e rrugës.
Shërbimet e Patrullës së Përgjithshme të Komisariatit të Policisë Fier ndërhynë menjëherë, bllokuan automjetin dhe nisën procedimin penal ndaj 39-vjeçarit për veprën “Pengimi i qarkullimit të mjeteve të transportit”. Materialet u referuan Prokurorisë së Fierit për veprime të mëtejshme.
Policia e Fierit paralajmëron se kontrollet ndaj parkimeve të parregullta do të jenë të vazhdueshme dhe çdo shkelës do të përballet me masa ligjore, për të garantuar sigurinë dhe qarkullimin normal në rrugët e qytetit.
