Fier – Pezullohet nga detyra noterja e dyshuar për falsifikim dokumentesh
Prokuroria pranë Gjykatës së Shkallës së Parë të Juridiksionit të Përgjithshëm Fier ka pezulluar nga detyra noteren A. H., e cila është vënë nën hetim për veprën penale “Falsifikimi i dokumenteve”, parashikuar nga neni 186/3 i Kodit Penal.
Sipas Prokurorisë, nga hetimet e deritanishme janë dokumentuar disa raste ku noterja A. H., që ushtron detyrën në qytetin e Fierit, dyshohet se ka falsifikuar akte noteriale duke paraqitur rrethana të rreme. Ajo akuzohet se ka hartuar dokumente në emër të noterëve të tjerë M. P., D. L. dhe E. C., duke falsifikuar nënshkrimet dhe vulat e tyre, si dhe se ka kryer veprime noteriale në mungesë të palëve.
Me kërkesë të Prokurorisë, Gjykata ka vendosur për noteren nën hetim masën e sigurimit personal “Ndalimi i daljes jashtë shtetit” dhe masën “Pezullimi i ushtrimit të një detyre apo shërbimi publik”.
Prokuroria e Fierit thekson se mbetet e angazhuar në goditjen e çdo vepre penale në fushën ekonomike, që cenon interesat e qytetarëve dhe interesin publik.
