Fier, premierë teatrale e dramës “Pacienti Doktor Frojd” në Teatrin “BYLIS”
Teatri “Bylis” në Fier do të prezantojë premierën e dramës “Pacienti i Doktor Frojdit” të autorit kroat Miro Gavran. Shfaqja do të mbahet për tre netë radhazi, më 30 dhe 31 tetor si dhe 1 nëntor, në orën 18:30.
Dramaturgjia e veçantë e kësaj vepre përqendrohet në një seancë imagjinare mes Adolf Hitlerit dhe psikoanalistit të njohur Sigmund Frojdit, gjatë së cilës Hitleri ekspozon frustrimet e tij që do të ndikojnë më vonë në ngjarjet tragjike të Luftës së Dytë Botërore.
Në role kryesore interpretojnë aktorët e mirënjohur Gaz Paja, Anila Bisha dhe Myzafer Ziflaj. Shfaqja është vënë në skenë nën regjinë e Besnik Bishës dhe ndihmës regjisor Anri Celibashi. Ky produksion mbështetet nga Bashkia Fier.
Biletat janë në shitje me çmim 300 lekë, dhe rezervimet mund të bëhen në numrin +355699931181.
