Fier – Prokuroria sekuestron pasuri të paligjshme me vlerë 6 milionë euro, kërkohet godinë e re dhe staf i kualifikuar
Në analizën vjetore të punës së institucionit, Prokurori i Fierit, Elion Mustafaj, ka vënë në pah arritjet dhe sfidat me të cilat është përballur prokuroria gjatë vitit të kaluar.
Mustafaj theksoi se, pavarësisht mungesave në trupën e prokurorëve dhe administratës, puna është zhvilluar në një nivel të kënaqshëm dhe në përputhje me udhëzimet e Këshillit të Ministrave dhe Prokurorit të Përgjithshëm.
“Pavarësisht vështirësive, kemi arritur të sekuestrojmë pasuri të paligjshme në vlerë deri në 6 milionë euro – përfshirë banesa, hotele, automjete, ora luksoze dhe garazhe,” deklaroi Mustafaj.
Ai bëri të ditur se janë hetuar edhe çështje penale që prekin sektorë të rëndësishëm si doganat, tatimet dhe institucione të tjera shtetërore. Një vëmendje e veçantë, sipas tij, i është kushtuar hetimeve të thelluara përmes metodave proaktive dhe ndjekjes së publikimeve mediatike.
Në përmbyllje të analizës, Prokurori i Fierit ngriti shqetësimin për mungesën e një godine funksionale për institucionin si dhe për nevojën urgjente të plotësimit të vendeve vakante me staf të kualifikuar, për të përballuar sfidat në rritje në fushën e drejtësisë.
