Fier – Punonjëset e një fasonerie protestojnë para Zyrës së Punës: “Po punojmë në skllavëri”
Rreth 80 punonjëse të fasonerisë “Intex”, e vendosur në fshatin Portëz të Fierit, protestuan paraditen e sotme përpara Zyrës së Punës, duke denoncuar uljen e njëanshme të pagave dhe kushtet e vështira në të cilat punojnë çdo ditë.
Punonjëset akuzojnë pronarin italian të fasonerisë se ushtron presion psikologjik mbi to, i fyen, i shan dhe pushon nga puna këdo që guxon të kërkojë rritje page ose të ngrejë zërin për të drejtat e veta. Protesta u zhvillua me tone të ashpra dhe me pankarta në duar, ndërsa gratë kërkuan ndërhyrjen e institucioneve shtetërore për të ndaluar padrejtësitë.
“Po punojmë në skllavëri! Në kontratë e kam pagën 17 mijë lekë dita, por kur e marr në bankë, shoh që është 15 mijë. Tani na kanë trefishuar pa paralajmërim shpenzimet për transportin, nga 8 mijë në 18 mijë lekë të vjetra në muaj, dhe nuk na lajmëruan. Vetëm pamë pagat që ishin më të ulëta,” – tha njëra nga punonjëset në protestë.
Sipas tyre, menaxhmenti i kompanisë po e justifikon uljen e pagave me rritjen e kostove të transportit dhe vështirësitë financiare që po përjeton subjekti.
Fasoneria “Intex” është në bashkëpronësi midis një shtetasi italian të quajtur Gilberto (…) dhe një subjekti shqiptar me seli në qytetin e Beratit. Kompania ka në total rreth 200 të punësuar, pjesa më e madhe gra dhe vajza nga zonat e Patosit, Fierit dhe Roskovecit.
Punonjëset kërkojnë rikthimin e menjëhershëm të kushteve të mëparshme, pagesë të drejtë për punën e tyre dhe trajtim me dinjitet në vendin e punës. Ato paralajmëruan se nëse kërkesat nuk merren parasysh, protestat do të përshkallëzohen në ditët në vijim.
