Fier – Situata në alert në urën e Mifolit, Çako: Prurjet arrijnë nivelin 7, gati për çdo emergjencë
Kreu i emergjencave civile, Haki Çako, ka inspektuar sot në terren situatën në urën e Mifolit, ku niveli i prurjeve të lumit vijon të mbetet shqetësues. Sipas Çakos, prurjet në këtë pikë kanë arritur nivelin 7, ndërsa pritet që gjatë mesditës të mbërrijnë edhe prurjet maksimale nga Tepelena dhe Përmeti, duke e vendosur zonën në një fazë të lartë rreziku.
Çako u shpreh se situata është monitoruar gjatë gjithë natës, por niveli aktual paraqet një rrisk të shtuar, ndonëse deri tani nuk ka banesa të prekura nga përmbytjet. Kreu i emergjencave theksoi se historiku i zonës tregon se në rast se lumi del nga shtrati, evakuimet e banorëve janë të pashmangshme, dhe për këtë arsye janë marrë të gjitha masat e nevojshme.
Ai bëri apel të fortë për të gjithë banorët përgjatë rrjedhës së lumit Vjosë që të jenë maksimalisht të kujdesshëm:
“Para gjithçkaje është jeta e qytetarëve,” u shpreh Çako, duke theksuar se strukturat e emergjencave janë në gatishmëri të plotë për çdo zhvillim.
Situata mbetet në monitorim të vazhdueshëm.
